Sabet 12 de Dicember, ai 10 or de sira, a l'Antiga Osteria Sant Andrea de Misent ghe sarà la presentazion del liber di stòri cuntaa a la prima edizion del concors "Stòri de Stremizzi", organizzaa da l'Osteria in de la Nòcc de Samòni.
El vòlumett el se ciama pròppi "Stòri de stremizzi. Quand che el dialett el fà pagura". Per l'occasion, se mangia el panetton e se bev el vin brulé, offrii da l'Osteria!
El liber el gh'ha 52 pagin, che gh'è denter 11 stòri e 7 illustrazion. L'è stà pubblicaa da l'editor Menaresta de Monscia e l'è scrivuu tutt in Milanes. L'è la nòstra strenna per el Natal 2009 e l'è foeura a offerta de almen 7.- franch ò, per chi se iscriv a Domà Nunch per l'ann 2010, l'è in omagg.
Ma se hinn cosè i stòri de stremizzi? Parlom de quei stòri con dent ona trama de pagura che l'è tipica de la tradizion oral del Milanes e de l'Insubria, i nòst territòri. L'è on corpus de narrazion che l'è ona part importanta del patrimòni antropològich e cultural di nòst gent: l'è staa tramandaa dai nònni ai pà, e dai pà ai fioeu, pròppi in di fregg ser d'autunn e d'inverno, quand tucc i component de la famiglia se trovaven in de la stalla per scoltà i vegg che cuntaven i stòri de stremizzi ò esempi. Tucc stòri de pagura, de orror, drammatich, financa trist. Stòri terribil ma cont on fascin che pian pian te tiraven dent se t'i scoltavet, anca perché chi i e cuntava l'era on espert in del doprà la vos e i paròll, fin a fatt istremì debon, soratutt se te seret on fiolin! Ma eren stòri che te insegnaven semper anca ona moral.
In tutta l'Europa gh'è i stòri de stremizzi: el par ona ròba strana, ma tanti vòlt l'è facil de trovà di personagg, di situazion, di simbol compagn in stòri cuntaa in sit e paes lontanissim vun de l'alter. I fradei Grimm e i antropòlogh moderni hann dimostraa che i stòri popolar gh'hann denter di miti antigh comè 'l mond: l'è pròppi quest chì el segrett de 'sti stòri. Paròll ch'evom quasi desmentegaa, che fin a ier pareven domà di ricòrd balzan sui laver di nòst vegg, incoeu diventen letteratura.
STÒRI DE STREMIZZI. Quand che el dialett el fa pagura, Editor Menaresta, Monscia, 52 pagin, 7.- €
| < Prec. | Succ. > |
|---|
